Парламентлараро алоқалар ривожланмоқда
  • 06 Декабрь 2016

Парламентлараро алоқалар ривожланмоқда

5 декабрь куни Ўзбекистон Республикаси Олий Мажлиси Сенатида мамлакатимизга Ўзбекистон Республикаси Президенти сайловини кузатиш мақсадида ташриф буюрган Россия Федерацияси Федерал Мажлиси Федерация Кенгаши раиси ўринбосари Ильяс Умаханов, Малайзия парламенти Сенати раиси ўринбосари Абдул Ҳалим бин Абд Самад, Литва Сейми (парламенти)нинг Ўзбекистон билан парламентлараро ҳамкорлик бўйича гуруҳи раиси Валериус Симулик, Эрон Мажлиси депутати, хавфсизлик ва ташқи сиёсат масалалари бўйича комиссияси аъзоси Муртазо Саффорий Натанзи, “Williams and Cardens” компанияси асосчиларидан бири Лиза Уильямс билан учрашувлар бўлиб ўтди.

Учрашувларда Ўзбекистонда сайлов кампанияси ҳақида фикр алмашилди. Меҳмонлар мамлакатда давлат ҳокимиятини янада демократлаштириш, парламентнинг давлат органлари тизимидаги ролини кучайтириш борасидаги ислоҳотлар, Олий Мажлис Сенатининг қонун ижодкорлиги ҳамда назорат-таҳлил фаолияти, шунингдек, Ўзбекистон Республикаси Президенти сайловига тайёргарлик кўриш ва уни ўтказиш доирасида амалга оширилган ишлар билан таништирилди.

Тадбирларда қайд этилганидек, сайлов мамлакат ижтимоий-сиёсий ва социал-иқтисодий ҳаётида олиб борилаётган ислоҳотлар самарадорлигини белгилайдиган муҳим омил ҳисобланади. Мамлакатимиз сайлов тизими хорижий давлатларнинг илғор тажрибалари, умумэътироф этилган халқаро стандартлар ҳамда халқимиз миллий ўзига хослигини инобатга олган ҳолда, изчил такомиллаштирилмоқда.

— Биз Ўзбекистонга шунчаки кузатувчи сифатида ташриф буюрганимиз йўқ, — деди учрашувда Ильяс Умаханов. — Мамлакатингизнинг жадал ривожланиши минтақа барқарорлигини таъминлашда ҳал қилувчи ўрин тутади. Президент сайлови эса Ўзбекистоннинг келажакдаги тараққиётини белгилаб беришга қаратилгани билан ғоят аҳамиятлидир. Сайлов жаҳон стандартларига мувофиқ ҳолда, юксак ташкилий савияда ўтказилди. Бу сиёсий тадбирни ўтказиш орқали Ўзбекистон давлат фаолиятининг самарадорлигини, Конституция ва қонунлар устунлигини, халқнинг бирдамлигини намойиш эта олди.

— Сайлов жараёнини кузатиш доирасида мен сиёсий тадбирда аёлларнинг фаол иштирокига гувоҳ бўлдим, — деди учрашувда Лиза Уильямс. — Хотин-қизлар сайлов комиссиялари таркибида, айниқса, овоз бериш жараёнида фаол қатнашганини кўриш мумкин. Бу Ўзбекистонда хотин-қизлар ролини ошириш борасида олиб борилаётган ишлар самарадорлигидан далолатдир.

Учрашувларда парламентлараро ҳамкорликни янада ривожлантириш бўйича амалий таклифлар билдирилди.

Зокир ХУДОЙШУКУРОВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn