Довруғи дунёга машҳур
  • 17 Ноябрь 2015

Довруғи дунёга машҳур

Хоразм қовунлари довруғи азалдан дунёга машҳур. Шу боис ушбу тотли неъматнинг хорижда ҳам харидорлари бисёр. Буни ҳисобга олган тадбиркор Саъдулла Хўжаев ташқи бозор талабларини пухта ўрганиб, янгиликка қўл урди.

Натижада Урганч туманининг Бекобод қишлоғида чет эл инвестицияси иштирокида “Хоразм қовунлари” масъулияти чекланган жамияти ташкил этилди. Шу тариқа воҳада етиштириладиган қовунларни замонавий усулда қайта ишлаб, экспортга жўнатиш имконияти яратилди.
— Қиймати 500 минг АҚШ долларилик технологияларимиз йилига 300 тонна маҳсулот тайёрлаш қувватига эга, — дейди корхона раҳбари С. Хўжаев. — Ушбу илғор ускуналар ёрдамида пўчоғидан ажратиб олинган қовун мағзи қайта ишланиб, қадоқланади ва музлатилади. Унинг уруғлари эса сараланиб, қуритилиб, келгуси йил ҳосили учун фермер хўжаликларига тарқатилади. Эътиборлиси, маҳсулотларимизни тўлиқ экспортга жўнатишни режалаштираяпмиз.
Яна бир муҳим жиҳати, 25 кишининг бандлиги таъминланган корхонага экспортбоп қовун етиштириш учун 50 гектар ер майдони ажратиб берилган. Бу ерда ҳосилни сифатли сақлаш мақсадида 400 тонна сиғимга эга музлаткич ҳам бунёд этилди.

Ойбек РАҲИМОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn