Косонсой туманида 5 нафар тиббиёт ходими ўз лавозимидан озод этилди
  • 19 Февраль 2018

Косонсой туманида 5 нафар тиббиёт ходими ўз лавозимидан озод этилди

 

Давлатимиз раҳбарининг Фаол тадбиркорлик, инновацион ғоялар ва технологияларни қўллаб-қувватлаш йилидаги Давлат дастури тўғрисидаги Фармонида “Ҳар бир давлат хизматчиси ҳар куни ўзининг меҳнати билан эгаллаб турган лавозимига лойиқлигини исботлаши шарт” деган қоидани рўёбга чиқаришга алоҳида эътибор қаратилган. Ушбу талаб барча соҳалар қатори тиббиёт тизими учун ҳам дахлдор. 

Наманган вилояти бирламчи тиббий-санитария хизмати бўйича ўтказилган ўрганишлар натижасида вилоятнинг Косонсой туманида ўз вазифасига юзаки ёндашиб, бугуннинг талаби ва аҳоли эҳтиёжларини ҳис қилмай ишлаётган  тиббиёт ходимлари ҳам борлиги маълум бўлди, дейилади Соғлиқни сақлаш вазирлиги Ахборот хизмати томонидан тарқатилган хабарда. 

Манбада айтилишича, Косонсой туман тиббиёт бирлашмаси бошлиғи Б. Холдоров ва бошлиқ ўринбосари Р. Абдуллаев, туман кўп тармоқли марказий поликлиника мудири М. Каримовалар давлатимиз раҳбари ва ҳукуматнинг, шунингдек, Соғлиқни сақлаш вазирлигининг меъёрий ҳужжатлари ижросини етарли даражада амалга оширмагани, жумладан, аҳолининг тиббий хизматга муҳтож қатламини қамраб олиш ишларини талаб даражасида ташкил этмаганлиги боис эгаллаб турган лавозимларидан озод этилган. 

Шунингдек, Вазирлар Маҳкамасининг “Бирламчи тиббий-санитария ёрдами муассасаларида тиббий хизматлар сифатини яхшилашга, ўтказилаётган профилактика тадбирларининг самарадорлиги учун маъсулиятни оширишга доир қўшмча  чора-тадбирлари тўғрисида”ги қарори ижроси юзасидан ўз зиммасига юклатилган вазифаларни етарли даражада амалга оширмагани, бирламчи тиббий-санитария ёрдами муассасаларида тиббий хизматлар сифатини яхшилашга, ўтказилаётган профилактика тадбирларининг самарадорлиги учун маъсулиятни оширишга қаратилган топшириқлар ижросини тизимли ташкил этмагани ва патронаж тадбирларига талаб даражасида эътибор қаратмагани учун Косонсой туман тиббиёт бирлашмасининг масъул ходими  М. Тошматов ва туман кўп тармоқли марказий поликлиника масъул ходими А. Абдуллаевлар вазифасидан озод этилди. 

Наманган вилоятдаги даволаш муассасаси раҳбарларига ишни аҳоли эҳтиёжи ва талабидан келиб чиқиб ташкил этиш, бунда ҳар бир хонадон ва унинг аъзоси эътиборда бўлиши лозимлиги, халқ билан доимий мулоқот қилиб, унинг розилиги ва аҳоли манфаатлари йўлида шахсий жавобгарликни ҳис қилиб ишлаш, бирламчи тиббий хизматга бўлган эҳтиёжни сифатли ва самарали қондириш каби муҳим вазифалар тушунтирилди. 

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn