Малакали таржимонлар хизмат кўрсатади
  • 19 Август 2015

Малакали таржимонлар хизмат кўрсатади

Айни кунларда Самарқандда бўлиб ўтадиган “Шарқ тароналари” X халқаро мусиқа фестивалига ҳозирлик ишлари қизғин паллага кирган. Айтиш жоизки, ушбу нуфузли тадбирга ташриф буюрадиган чет эллик меҳмонларга юксак даражада хизмат кўрсатиш ҳамда уларни юртимиз тарихи билан яқиндан таништиришда экскурсоводлар ва таржимонларга эҳтиёж сезилади.

Шу мақсадда Самарқанд давлат чет тиллар институтидан 200 нафарга яқин ўқитувчи ҳамда талабалар танлов асосида сараланиб, улар учун махсус семинар-тренинглар ўтказилаяпти.
— Таржимонларни танлашда уларнинг юртимиз ўтмиши, Самарқанддаги қадимий обида ва зиёратгоҳлар ҳақида нечоғли билимга эга эканлигига алоҳида эътибор қаратилди, — дейди Самарқанд давлат чет тиллар институти ректори Ғанишер Раҳимов. — Семинарларда иштирокчиларга интерфаол усулда ахборот-коммуникация воситалари ҳамда кўргазмали қуроллардан фойдаланилган ҳолда мамлакатимиз салоҳияти ва сайёҳлик имкониятлари хусусида маълумотлар берилмоқда.
Машғулотларга “Ўзбектуризм” минтақавий филиали ҳамда Самарқанд давлат музей-қўриқхонаси ва унинг қошида ташкил этилган экскурсоводлар тайёрлаш маркази мутахассислари ҳам жалб қилинган.

Мамадиёр ЗИЁДИНОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn