Эркак ўқитувчилар нега мактабни тарк этди?
  • 23 Январь 2018

Эркак ўқитувчилар нега мактабни тарк этди?

Яқинда маҳалламиздаги нуроний отахонлардан бири невараси ўқийдиган мактабдаги муаллимларнинг деярли барчаси хотин-қизлар эканлигини айтиб, эркак ўқитувчилар қаёққа кетган, дея  савол берди.

Урганч шаҳар халқ таълими ходимларининг бир анжуманида иштирок этиб, отахоннинг эътирози ўринли эканлигига  амин бўлдим. Чунки катта зални тўлдириб ўтирган педагогларнинг деярлик тўқсон тўққиз фоизи хотин-қизлардан иборат эди.

Руҳшуносларнинг фикрича, болалик ва ўсмирлик палласида ўғил болаларда мардлик ва жасорат, қатъият ва шижоат, ор-номус ва ғурур туйғуларининг шаклланишида, уларнинг чинакам йигит бўлиб етишишида эркак устозларнинг роли жуда катта экан. Оилада фарзанд тарбияси билан асосан оналар шуғулланади. Демак, уйда ҳам, мактабда ҳам ўғил болалар тарбиясининг аёл киши қўлида қолиши мақсадга мувофиқ эмас.

Маълумотларга кўра, айни кунда Урганч шаҳридаги умумтаълим мактабларида фаолият кўрсатаётган 1979 нафар педагог ходимларнинг 1738 нафари ёки 87,8 фоизи хотин-қизлардан иборат. Хўш, унда отахон айтганидек, эркак ўқитувчилар нега мактабни тарк этди? Ёки педагогика йўналишидаги олий ўқув юртларида фақат қизлар таҳсил олаяптими? 2017 йилда Урганч давлат университетининг бакалавриат ва магистратура босқичларини педагогик йўналишлар бўйича тамомлаган 1832 нафар ёш мутахассиснинг 751 нафари ёки 41 фоизини  йигитлар ташкил қилган. Афсус уларнинг бир қисми меҳнат фаолиятини таълим соҳасида эмас, бошқа тармоқларда олиб боришмоқда.

Яқинда Тошкент Тиббиёт академияси битирувчиларига ҳудудларда шифокорларга бўлган эҳтиёжни ўрганиш натижалари бўйича ишга йўлланма берилди. Балки бу тажрибани педагогика йўналишидаги олий ўқув даргоҳларида ҳам қўллаш, йигитларнинг ҳам ўз мутахассислиги бўйича ишга жойлаштиришнинг манзилли режасини амалиётга жорий этиш вақти келгандир. Шунда мактабларда эркак ўқитувчилар сони кўпайиб, уларнинг таълим-тарбия жараёнидаги қаттиққўллиги боис ўқувчилар ўртасида тартиб-интизом масалалари янада яхшиланар. Бу борада сиз қандай фикрдасиз? 

Одилбек ОДАМБОЕВ,

“Халқ сўзи” мухбири.                                                                                                               

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn